Mu gihe ibihugu byinshi ku isi bikomeje gushora imbaraga mu guteza imbere ubumenyi n’ubushakashatsi mu bijyanye n’umutekano, u Rwanda na rwo rwatangiye urugendo rushya rugamije kubaka ubushobozi bw’ingabo zarwo binyuze mu burezi buhanitse.
Ibi bikubiye mu cyemezo giherutse gufatwa n’Inteko Ishinga Amategeko cyemeza ishyirwaho rya Kaminuza y’Igihugu ya Gisirikare, izaba ihuza inyigisho, amahugurwa n’ubushakashatsi bijyanye no kurinda igihugu no kubungabunga umutekano.
Iyi kaminuza nshya igamije guhuriza hamwe amashuri n’ibigo bitandukanye byigisha ibijyanye n’igisirikare n’umutekano, bikaba bizafasha mu gutegura neza abofisiye n’abandi banyamwuga bafite ubumenyi buhambaye. Ni umushinga ugaragaza icyerekezo cy’u Rwanda cyo gushyira imbere ubumenyi nk’inkingi ikomeye mu kurinda igihugu no kubungabunga amahoro.
Kuva kera, ingabo z’u Rwanda zifite amashuri atandukanye atanga amahugurwa n’inyigisho ku basirikare. Ariko ayo mashuri yakoraga mu buryo butandukanye kandi impamyabumenyi zatangwaga kenshi binyuze ku bufatanye na Kaminuza y’u Rwanda.
Minisitiri w’Ingabo, Juvenal Marizamunda, yigeze gusobanura ko u Rwanda rusanzwe rufite amashuri ya gisirikare ariko ko ku rwego rwa kaminuza hari make cyane. Yagaragaje ko Ishuri rya Gisirikare rya Gako ritanga amahugurwa ku basirikare bato bashaka kuba abofisiye, mu gihe iriri i Nyakinama ryo ritanga amahugurwa ku bofisiye bakuru barimo ba Major, Lieutenant Colonel na Colonel.
Yavuze ko kugira ngo urwego rw’uburezi rwa gisirikare rutere imbere, hakenewe kaminuza yihariye ihuza ayo mashuri yose kandi igatanga impamyabumenyi zayo bwite.
Nk’uko biteganywa n’itegeko ryemejwe n’Inteko Ishinga Amategeko, Kaminuza ya Gisirikare y’u Rwanda izaba ifite inshingano zitandukanye zirimo: Gutanga inyigisho zo ku rwego rwo hejuru mu bijyanye n’igisirikare n’umutekano, Gutanga impamyabumenyi, impamyabushobozi n’andi mashimwe ajyanye n’uburezi no Gukora ubushakashatsi n’isesengura ku bibazo by’umutekano ku rwego rw’igihugu, akarere ndetse n’isi muri rusange.
Iyi kaminuza izahuza koleje na academy zitandukanye ziri mu nzego z’umutekano zirimo Ingabo z’u Rwanda, Polisi y’u Rwanda ndetse n’Urwego rw’Igihugu rushinzwe Iperereza n’Umutekano.
Ibi bivuze ko abiga muri iyo kaminuza bazahabwa ubumenyi buhuza imyitozo ya gisirikare n’amasomo y’ikirenga ajyanye n’ubuyobozi, ikoranabuhanga, amategeko, ndetse n’ubushakashatsi ku bibazo by’umutekano.
Kimwe mu bintu bishya biteganyijwe muri iyi kaminuza ni ishyirwaho ry’ishuri ryihariye rizigisha abofisiye bakuru cyane. Iri shuri rizwi nka National Defense College, rikazajya ryakira abasirikare bafite amapeti yo hejuru kuva kuri Colonel kuzamuka kugera ku ba Général.
Iri shuri rizafasha mu gutegura abayobozi bakuru b’ingabo bafite ubushobozi bwo gufata ibyemezo bikomeye bijyanye n’umutekano w’igihugu n’ibikorwa bya gisirikare ku rwego rwo hejuru.
Abasesenguzi bavuga ko iri shuri rizafasha mu kongera ubushobozi bw’ingabo mu bijyanye n’imiyoborere, igenamigambi rya gisirikare n’ubusesenguzi ku bibazo by’umutekano by’igihe kirekire.
Nubwo iyi kaminuza nshya izaba yigenga, biteganyijwe ko izakomeza gukorana bya hafi na Kaminuza y’u Rwanda mu bijyanye n’amasomo n’ubushakashatsi.
Umuyobozi Mukuru wa Kaminuza y’u Rwanda, Ass. Prof. Didas Kayihura Muganga, yasobanuye ko amasomo menshi yatangwaga ku basirikare atari ajyanye n’igisirikare gusa, ahubwo ari amasomo asanzwe yigishwa no mu zindi kaminuza.
Yavuze ko muri Gako hari porogaramu nyinshi ziganjemo amasomo atandukanye arimo: ubuvuzi, amategeko, imibare, ubugenge, ibinyabuzima, ubutabire, ubuhanga mu bya mudasobwa, ubuhanga mu by’ubwubatsi ndetse n’ubuforomo.
Aya masomo yose ashobora gukomeza gutangwa, yaba ari muri iyo kaminuza nshya cyangwa akomeza gukorwa ku bufatanye na Kaminuza y’u Rwanda.
Abahanga mu bya gisirikare bagaragaza ko kaminuza nk’iyi igira uruhare rukomeye mu gutanga ibisubizo ku bibazo by’umutekano.
Uretse gutegura abasirikare b’abanyamwuga, kaminuza za gisirikare zifasha mu gukora ubushakashatsi ku bibazo by’umutekano byugarije ibihugu n’akarere. Ibi bishobora kuba birimo iterabwoba, intambara z’ikoranabuhanga, imicungire y’amakimbirane n’uburyo bwo kubungabunga amahoro.
Ku Rwanda, kuba iyi kaminuza izaba ifite ishami ry’ubushakashatsi bivuze ko ingabo n’inzego z’umutekano zizaba zifite urubuga rwihariye rwo gusesengura ibibazo by’umutekano no gushaka ibisubizo birambye.
Minisitiri w’Ingabo yavuze ko aya mavugurura yose agamije kunoza imiyoborere y’Ingabo z’u Rwanda (RDF) kugira ngo zibashe gusohoza neza inshingano zazo.
Mu gihe u Rwanda rumaze imyaka myinshi rugaragaza ubushobozi mu kubungabunga amahoro mu bihugu bitandukanye, kuba rufite kaminuza yihariye ya gisirikare bishobora kurushaho kongera ubumenyi n’ubushobozi bw’abasirikare barwo.
Ibi kandi bizafasha mu gutegura abayobozi b’ingabo bafite ubumenyi buhanitse, bashobora guhangana n’ibibazo by’umutekano by’igihe kizaza.
Muri rusange, ishyirwaho rya Kaminuza ya Gisirikare y’u Rwanda rifatwa nk’intambwe ikomeye mu guteza imbere uburezi n’ubushakashatsi mu bijyanye n’umutekano.
Iyi kaminuza izafasha u Rwanda kugira urwego ruhuriweho rw’inyigisho za gisirikare, itange impamyabumenyi zayo bwite kandi iteze imbere ubushakashatsi ku bibazo by’umutekano ku rwego rw’igihugu no ku rwego mpuzamahanga.
Ku banyarwanda benshi, uyu mushinga ugaragaza icyerekezo cy’igihugu cyo gukomeza kubaka inzego z’umutekano zishingiye ku bumenyi, ku bushakashatsi no ku miyoborere ihamye. Ibi bikaba bishobora kugira uruhare runini mu gukomeza kubungabunga umutekano n’iterambere ry’igihugu mu gihe kiri imbere.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
