Igisirikare cy’u Rwanda n’icya TPDF byahuje imbaraga
Abayobozi b’Ingabo z’u Rwanda (RDF) n’iza Tanzania (TPDF) bahuriye mu Karere ka Karagwe muri Tanzania mu nama ya 15 ihuza abayobozi b’ingabo zikorera ku mipaka, igamije gushakira hamwe ibisubizo ku bibazo by’umutekano no gukomeza kunoza ubufatanye hagati y’ibihugu byombi.
Iyi nama yatangiye ku wa 24 Werurwe 2026 ikazarangira ku wa 26 Werurwe 2026, ihuje Diviziyo ya 5 y’Ingabo zirwanira ku butaka za RDF n’Ingabo za TPDF zigize Burigade ya 202, zikorera mu duce twegereye umupaka uhuza u Rwanda na Tanzania.
Itsinda ry’u Rwanda riyobowe na Major General Ruki Karusisi, mu gihe irya Tanzania riyobowe na Brigadier General Gabriel Elias Kwiligwa.
Aba bayobozi bahuriye ku ntego imwe yo kongera imbaraga mu gukumira ibikorwa byambukiranya imipaka mu buryo bunyuranyije n’amategeko, birimo ubucuruzi bwa magendu n’ibindi byaha bikomeje kugaragara muri utu duce.
Ku munsi wa mbere w’iyi nama, aba bayobozi bakoze ingendo mu bice bitandukanye byo ku mipaka hagamijwe kureba imiterere y’umutekano ku rwego rwo hasi no kuganira n’abaturage bahatuye.
Mu duce basuye harimo imidugudu ya Nyarubare na Katwe yo mu Karere ka Kyerwa muri Tanzania, ndetse n’umudugudu wa Nyakakoni uhana imbibi n’Umurenge wa Rwimiyaga mu Karere ka Nyagatare mu Rwanda.
Aha hantu, harangwa cyane n’inzira zitemewe zinyura mu biyaga, inzuzi n’ibishanga, by’umwihariko ku ruzi rw’Akagera, bikunze gukoreshwa n’abambukiranya imipaka mu buryo bunyuranyije n’amategeko. Abayobozi b’ingabo bagaragaje ko izi nzira ari zo zikoreshwa cyane mu bikorwa bya magendu n’ibindi byaha byambukiranya imipaka.
Mu biganiro bagiranye n’abaturage, basabye abaturage kwirinda kwishora mu bikorwa bitemewe nko kwambuka imipaka mu buryo butemewe ndetse no kuroba mu buryo bunyuranyije n’amategeko mu mazi asangiwe n’ibihugu byombi. Banabibukije ko umutekano ari inshingano za buri wese, bityo ubufatanye bw’abaturage n’inzego z’umutekano bukaba ingenzi mu kuwubungabunga.
Abayobozi b’ingabo z’ibihugu byombi bashimangiye ko hari gukenerwa ingamba zihutirwa zo gukumira ibikorwa bya magendu no gukaza amarondo ku mipaka, ndetse no gukomeza guhanahana amakuru ku gihe kugira ngo habeho gukumira ibyaha bitaraba.
Iyi nama ibaye mu gihe umutekano ku mipaka y’ibihugu byo mu karere ukomeje kwitabwaho by’umwihariko, aho ibihugu bitandukanye bikomeje gushyira imbaraga mu bufatanye mu bya gisirikare no mu rwego rw’umutekano rusange.
U Rwanda na Tanzania bisanzwe bifitanye umubano mwiza, kandi iyi nama iragaragaza ubushake bwo kurushaho kuwunoza, cyane cyane mu guhangana n’ibibazo byambukiranya imipaka.
Abasesenguzi b’ibijyanye n’umutekano mu karere bagaragaza ko inama nk’izi zifite akamaro kanini kuko zituma habaho gusangira amakuru, gufata ingamba zihuriweho no gukumira ibibazo by’umutekano mbere y’uko bifata indi ntera.
Ibi bikaba bishimangira ko ubufatanye hagati y’ibihugu ari imwe mu nzira z’ingenzi zo kubaka umutekano urambye mu karere ka Afurika y’Iburasirazuba.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
