Mu gihe umutekano ukomeje kuzamba mu Burasirazuba bwa Repubulika Iharanira Demokarasi ya Congo (RDC), ifatwa ry’umunyapolitiki Willy Mishiki n’ingabo za leta ryateje impaka zikomeye mu ruhando rwa politiki no mu baturage.
Uyu mudepite ukomoka muri teritware ya Walikale yatawe muri yombi n’ingabo za FARDC nyuma y’amagambo yatangaje ku bitero by’ibisasu biherutse kubera mu mujyi wa Goma, amagambo yahise ateza impaka n’impungenge mu nzego z’umutekano.
Amakuru aturuka mu nzego zitandukanye avuga ko Mishiki yafashwe nyuma yo gutangaza ko ibisasu byaguye i Goma byatewe n’ingabo za FARDC zifatanyije n’imitwe yitwaje intwaro y’abaturage izwi ku izina rya Wazalendo.
Ibyo bisasu byagize ingaruka zikomeye ku baturage, kuko byahitanye ubuzima bw’umukozi w’Ikigo cy’Umuryango w’Abibumbye gishinzwe abana (UNICEF) ndetse bigakomeretsa abandi baturage benshi bari muri uwo mujyi.
Nyuma y’ayo magambo, guverinoma ya RDC yahise iyahakana ivuga ko ibitero byabaye i Goma byakozwe n’ihuriro rya AFC/M23 rirwanya ubutegetsi bwa Kinshasa. Abayobozi ba leta bavuze ko amagambo ya Mishiki ashobora guteza urujijo mu baturage no gukwirakwiza amakuru atizewe mu gihe igihugu kiri mu bihe bikomeye by’intambara n’umutekano muke.
Willy Mishiki si izina rishya mu ruhando rwa politiki muri Congo. Yamenyekanye cyane muri teritware ya Walikale, aho yari aherutse gutorerwa kuba umudepite mu Nteko Ishinga Amategeko ihagarariye ako gace.
Mbere yo kugera muri politiki y’Inteko, yari azwi nk’umwe mu bavugizi b’umutwe wa Wazalendo, umutwe w’abaturage witwaje intwaro uvuga ko uharanira gushyigikira ingabo za leta mu kurwanya AFC/M23.
Gusa nubwo bamwe bawubona nk’abafasha ingabo za leta, hari n’imiryango mpuzamahanga iharanira uburenganzira bwa muntu iwushinja kugira uruhare mu bikorwa by’ihohoterwa n’iyicarubozo rikorerwa abaturage.
Ifatwa rya Mishiki ryahise ritera impaka mu banyapolitiki batandukanye ndetse no mu basesenguzi b’ibibazo bya politiki muri RDC.
Iki kibazo kandi kije gikurikira andi makuru yagiye avugwa mu minsi ishize ku mirwano n’ibitero by’ibisasu mu duce dutandukanye twa Kivu y’Amajyaruguru n’iy’Amajyepfo. Hari aho ingabo za FARDC zishinjwa gukoresha ibisasu bya drones mu bice bigenzurwa n’abarwanya ubutegetsi, mu gihe na zo zivuga ko ari uburyo bwo kwirwanaho mu gihe imirwano ikomeje gukaza umurego.
Ku rundi ruhande, imiryango iharanira uburenganzira bwa muntu n’imiryango mpuzamahanga ikomeje gusaba iperereza ryigenga ku byabaye mu bitero by’i Goma. Bavuga ko ari ngombwa ko hamenyekana ukuri ku byabaye, kugira ngo ababuze ubuzima n’abakomeretse babone ubutabera kandi n’ababigizemo uruhare babiryozwe.
Kugeza ubu, ubuyobozi bwa RDC ntiburatangaza ku mugaragaro ibyaha Willy Mishiki aregwa cyangwa igihe azagezwa imbere y’ubutabera. Ibi byatumye benshi mu banyapolitiki n’abaturage bakomeza kwibaza niba ifungwa rye rishingiye ku iperereza ryimbitse cyangwa niba rifitanye isano n’amagambo yavuze ku bitero by’i Goma.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
