Mu gihe umutekano mu burasirazuba bwa Repubulika Iharanira Demokarasi ya Congo ukomeje kuba ikibazo gikomeye gihangayikishije akarere kose, Leta Zunze Ubumwe za Amerika zongeye kugaragaza uruhare rwazo mu gushaka amahoro arambye hagati ya RDC n’u Rwanda.
Ibi byagaragariye mu masezerano mashya ya Washington, agamije kugabanya ubushyamirane no kugarura ituze mu karere k’ibiyaga bigari.
Aya masezerano aje akurikira ibiganiro byinshi byagiye bikorwa n’impande zitandukanye, mu gihe imirwano yakomeje gufata indi ntera mu bice bya Kivu y’Amajyaruguru n’iy’Amajyepfo, aho imitwe yitwaje intwaro ikomeje kugira uruhare rukomeye mu guhungabanya umutekano w’abaturage.
Ku ruhande rwa RDC, aya masezerano azanye inshingano zikomeye zigomba gushyirwa mu bikorwa mu gihe gito, ibintu benshi bibaza niba bizashoboka koko, hashingiwe ku mateka y’amasezerano nk’aya akunze gusinywa ariko ntashyirwe mu bikorwa uko bikwiye.
Icya mbere kigaragara nk’icy’ingenzi cyane ni icyemezo cyo gukuraho burundu umutwe wa FDLR ku butaka bwa Congo. Uyu mutwe umaze imyaka myinshi ushinjwa guteza umutekano muke mu karere no kuba intandaro y’umubano mubi hagati ya RDC n’u Rwanda.
Kuba Kinshasa yemeye kuwurwanya no kuwusenya burundu ni intambwe ikomeye, ariko ishyirwa mu bikorwa ryabyo rikaba ari ryo rizagena niba ayo masezerano azagira icyo ageraho.
Ikindi cy’ingenzi ni uguhagarika burundu ubufatanye bushobora kuba hagati y’ingabo za Congo (FARDC) n’imitwe yitwaje intwaro. Ibi ni byo byakunze kunengwa n’amahanga, aho RDC yashinjwaga gukorana n’imitwe irimo FDLR mu bikorwa bya gisirikare. Aya masezerano asaba ko ibyo bihagarara burundu, bikaba bishobora guhindura byinshi mu mikorere y’ingabo za Congo.
Nanone kandi, RDC yasabwe gushyira imbere kurinda abaturage bose nta vangura iryo ari ryo ryose. Ibi bije mu gihe hari impungenge zikomeye ku mutekano w’amoko amwe n’amwe, by’umwihariko abatuye mu burasirazuba bw’igihugu, bakunze kwibasirwa n’intambara n’ihohoterwa rikabije.
Ku bijyanye n’igisubizo kirambye, aya masezerano agaragaza ko hakenewe ibiganiro bya politiki hagati ya leta ya Congo n’imitwe yitwaje intwaro igizwe n’Abanye-Congo. Ibi bishobora gufatwa nk’intambwe yo gushaka umuti w’imbere mu gihugu, aho gukomeza kwishingikiriza gusa ku gisirikare.
Hari kandi ingingo yo kubahiriza agahenge, aho RDC yemeye guhagarika imirwano no kwirinda ibikorwa bya gisirikare bishobora kongera umwuka mubi mu bice bimaze igihe birimo intambara. Ibi bizasaba ubushake bwa politiki n’ubugenzuzi buhoraho kugira ngo byubahirizwe.
Icya nyuma ariko kidakwiye gusuzugurwa ni ugukorana n’amahanga n’abahuza mu gushyira mu bikorwa aya masezerano. Amerika n’indi miryango mpuzamahanga bitegerejweho kugira uruhare rukomeye mu gukurikirana no kugenzura uko impande zombi zubahiriza ibyo ziyemeje.
Nubwo ibi byose byumvikana neza ku mpapuro, amateka agaragaza ko amasezerano nk’aya atajya ashyirwa mu bikorwa uko yifuzwa. Ibi bituma ikibazo gikomeza kwibazwa n’abatari bake: Mbese RDC izubahiriza koko ibyo yasinyiye i Washington?
Icyizere kirahari, ariko n’impungenge ni nyinshi. Ibisubizo nyakuri bizagaragarira mu bikorwa, si mu magambo.
Mu gihe abaturage bo mu burasirazuba bwa Congo bakomeje gusaba amahoro arambye, isi yose ihanze amaso Kinshasa, itegereje kureba niba aya masezerano azahindura amateka cyangwa niba aziyongera ku yandi atarigeze agera ku ntego yayo.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
