Gutabwa muri yombi kw’uwahoze ari Minisitiri gukomeje guteza impaka nyuma y’ibura rye ryateye urujijo
Mu gihugu cya Kenya haravugwa inkuru ikomeje guteza impaka mu nzego za politiki n’umutekano, nyuma y’uko uwahoze ari Minisitiri w’Ububanyi n’Amahanga, Raphael Tuju, agaragaye nyuma y’iminsi ibiri avugwaho kuburirwa irengero, agahita atabwa muri yombi n’inzego za polisi.
Ibi byabaye ku wa Mbere nyuma y’uko Tuju yari amaze iminsi itatu ashakishwa, aho byari byatangajwe ko we n’umushoferi we Steve Mwanga babuze ku buryo butunguranye, bigateza impungenge ko bashobora kuba barashimuswe.
Kumenyekana kw’amakuru y’ibura rya Tuju byahise bikurura impaka mu gihugu hose, cyane cyane mu banyapolitiki bo mu ishyaka rya ODM, basabye inzego z’umutekano gukora iperereza ryihuse.
Senateri Oburu Oginga yavuze ko iki kibazo gishobora kwangiza isura ya Kenya ku rwego mpuzamahanga, mu gihe abandi bayobozi nka Otiende Amolo na Jared Okelo bo basabaga ko Perezida ubwe yakwivanga muri iki kibazo kugira ngo gikemuke vuba.
Abandi banyapolitiki barimo Justin Muturi, Eugene Wamalwa na Kalonzo Musyoka na bo bagaragaje impungenge, banagaragara bashyigikiye Tuju mu gihe yari amaze kongera kuboneka.
Mu kiganiro yagiranye na Citizen TV mbere gato y’ifatwa rye, Tuju yavuze ko atashimuswe ahubwo yahisemo kwihisha nyuma yo gukeka ko ari gukurikiranwa n’imodoka zitazwi.
Yagize ati: “Nabonye imodoka zitanditseho ibirango bidasanzwe zinkurikira, mpita mpindukira njya mu muhanda wa Nandi Road i Karen, ndazicika.”
Yakomeje avuga ko yaje kwakirwa n’umuryango wo mu gace ka Kiambu wamuhishe mu gihe yari atarongera kugaragara.
Tuju yanavuze ko impamvu atigeze yitabaza polisi ari uko yari afite ubwoba, ashingiye ku bandi bantu yavuze ko bishwe cyangwa bashimuswe mu bihe byashize.
Umuyobozi w’iperereza ku byaha, Mohamed Amin, yatangaje ko Tuju atigeze ashimutwa, ahubwo ibura rye ryari “ryateguwe”, aho yavuze ko yari mu rugo rwe igihe cyose.
Ibi byahise bitera impaka, kuko abunganira Tuju mu mategeko bo bavuze ko yafashwe agakubitwa ndetse agakomereka ubwo yajyanwaga kuri sitasiyo ya polisi ya Karen.
Banavuze ko bagomba kumujyana kwa muganga kugira ngo avurwe, nyuma y’uko agaragaje ibikomere.
Ibyabereye kuri sitasiyo ya Karen byarushijeho guteza impaka, aho bivugwa ko bamwe mu banyapolitiki barimo Justin Muturi na Eugene Wamalwa na bo basunitswe n’abapolisi ubwo bageragezaga kujya kureba Tuju.
Ibi byatumye bamwe batangira kwibaza ku buryo inzego z’umutekano zubahiriza amategeko n’uburenganzira bwa muntu.
Amakuru atandukanye aravuga ko ikibazo Tuju arimo gishobora kuba gifitanye isano n’amakimbirane y’ubucuruzi, cyane cyane ajyanye n’igurishwa ry’imitungo ye i Nairobi kubera ideni rya banki.
Depite Caroli Omondi yavuze ko amakimbirane nk’ayo atagomba gukemurwa mu buryo bunyuranyije n’amategeko, agaragaza ko bishobora kuba ari yo ntandaro y’ibi bibazo byose.
Urwego rushinzwe ubugenzacyaha (DCI) rwatangaje ko rwatangiye iperereza ryimbitse kuri iki kibazo, ndetse ko rwasabye abaturage gutanga amakuru yafasha kumenya ukuri ku byabaye.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
