Umutekano wongeye kuzamba mu gitondo cyo kuri iki Cyumweru, tariki ya 22 Gashyantare 2026, mu gace ka Kavumu gaherereye muri Bukavu, muri Teritwari ya Kabare, mu Ntara ya Kivu y’Amajyepfo, nyuma y’imirwano ikaze yabaye kuva ku wa Gatandatu ushize ihuza ihuriro rya AFC/M23 n’ingabo za Leta ya Repubulika Iharanira Demokarasi ya Congo (FARDC) zifatanyije n’iz’u Burundi n’imitwe ya Wazalendo ndetse na FDLR.
Amakuru aturuka mu baturage no mu bayobozi bo mu nzego z’ibanze agaragaza ko imirwano yatangiye mu gitondo cyo ku wa Gatandatu, iza kugabanuka mu masaha ya saa sita, ariko yongera kubura bundi bushya nimugoroba. Uru rusaku rw’imbunda rwakomeje no mu gitondo cyo ku Cyumweru, bituma ibikorwa byose bihagarara mu mujyi wa Kavumu no mu nkengero zawo.
Umwe mu baturage batuye ahitwa Katana, mu birometero bike uvuye ku Kibuga cy’Indege cya Kavumu, yavuze ko imirwano yatangiye nyuma y’uko umwe mu barwanyi ba Wazalendo ajyanwe mu kigo nderabuzima.
Ati: “Nyuma y’amasaha make, amasasu atangira kumvikana. Kuva Katana kugera Kavumu, twumvaga urusaku rwinshi rw’amasasu.”
Undi muturage wo muri ako gace yemeje ko kurasa byongeye gukara ahagana saa kumi n’imwe n’igice z’umugoroba (17h30), bikaza gufata indi ntera ahagana saa kumi n’ebyiri n’iminota 40 (18h40), aho byavuzwe ko Wazalendo, FDLR na FARDC bongereye ingufu mu isoko rikuru rya Kavumu, bigaragaza ko impande zombi zari mu myiteguro yo gukomeza imirwano.
Amakuru amwe yemeza ko nyuma y’iyo mirwano, AFC/M23 yasubije inyuma uruhande rwa Leta, abarimo bahungira mu mashyamba akikije ako gace.
Iyi mirwano yahungabanyije bikomeye urujya n’uruza ku muhanda uhuza umujyi wa Bukavu na Kavumu, ndetse n’ibikorwa by’ubucuruzi n’ubuhinzi byari bisanzwe bitunze abaturage. Abenshi bahisemo kuguma mu ngo zabo kubera ubwoba bw’amasasu, mu gihe abandi bahungiye mu bice bifatwa nk’ibifite umutekano muke kurushaho.
Kavumu ifite akamaro kanini mu by’ingendo n’ubucuruzi kubera Ikibuga cy’Indege cya Kavumu, gikora nk’irembo rikomeye rihuza Kivu y’Amajyepfo n’utundi turere. Igenzurwa ry’aka gace rifatwa nk’iry’ingenzi mu by’umutekano n’imikorere ya gisirikare muri Teritwari ya Kabare.
Ubwo AFC/M23 yari imaze kwigarurira ibice byinshi byo mu burasirazuba bwa RDC birimo imijyi ikomeye nka Goma na Bukavu, ibintu byakomeje guhindura isura y’umutekano mu karere.
Ku rundi ruhande, Wazalendo ni izina rihuriweho n’imitwe yitwaje intwaro ivuga ko irwanirira kurinda igihugu no gufasha FARDC, ariko imikorere n’imitegekere yayo bikaba bitandukanye bitewe n’aho ikorera, bikongera ubukana n’urusobe rw’amakimbirane mu karere.
Kugeza ubu, nta mibare yemewe y’abaguye cyangwa abakomeretse iratangazwa ku mugaragaro. Icyakora, abaturage bo muri Kavumu na Kabare bakomeje kugaragaza impungenge zikomeye ku hazaza h’umutekano wabo, mu gihe imirwano ishobora kongera kubura igihe icyo ari cyo cyose.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
