Mu cyemezo cyateye impaka zikomeye ku mugabane wa Afurika no ku isi muri rusange, Impuzamashyirahamwe y’Umupira w’Amaguru muri Afurika (CAF) yatangaje ko igihugu cya Maroc ari cyo cyegukanye igikombe cya Afurika (AFCON), nyuma yo kwambura Sénégal intsinzi mu mukino wa nyuma wari wabaye mu ntangiriro z’uyu mwaka.
Ibi byemezo byafashwe nyuma y’uko Akanama k’Ubujurire ka CAF kemeje ubujurire bwari bwatanzwe n’Ishyirahamwe ry’Umupira w’Amaguru rya Maroc (FRMF), buvuga ko Sénégal yakoze amakosa akomeye yarenze ku mategeko agenga irushanwa.
Amakuru atangwa na CAF agaragaza ko mu mukino wa nyuma wabereye i Rabat muri Mutarama 2026, ibintu byafashe indi ntera ubwo ikipe ya Sénégal, izwi nka “Lions of Teranga”, yavuye mu kibuga mu gihe umukino wari ugikomeje.
Ibi byabaye nyuma y’uko umusifuzi atanze penaliti ku ruhande rwa Maroc, icyemezo Sénégal itishimiye. Abakinnyi ba Sénégal bahise bafata umwanzuro wo kuva mu kibuga bagaragaza ko batishimiye imisifurire, ibintu CAF yavuze ko ari ukwica amategeko agenga amarushanwa.
Mu itangazo rirambuye ryashyizwe ahagaragara, Akanama k’Ubujurire ka CAF katangaje ko ubujurire bwa Maroc “bwemewe mu buryo bw’amategeko kandi bufite ishingiro.”
CAF yagaragaje ko imyitwarire ya Sénégal iri mu rwego rw’ibivugwa mu ngingo ya 82 n’iya 84 z’amategeko agenga igikombe cya Afurika, zihana amakipe ava mu kibuga atabiherewe uburenganzira.
Kubera iyo mpamvu, CAF yafashe icyemezo cyo guha Maroc intsinzi ku bitego 3-0 mu buryo bwitwa “walkover”, bityo ihita yegukana igikombe.
Iki cyemezo ni cyo cya mbere kibayeho mu mateka ya AFCON aho igikombe gihindurirwa nyiracyo nyuma y’umukino wa nyuma warangiye, bikaba byateje impaka nyinshi mu bakunzi b’umupira w’amaguru.
Abasesenguzi b’imikino bavuga ko ibi bishobora kugira ingaruka zikomeye ku mikinire n’imyitwarire y’amakipe mu marushanwa akomeye, cyane cyane ku bijyanye no kubahiriza ibyemezo by’abasifuzi n’amategeko.
Ku ruhande rwa Sénégal, iki cyemezo cyabaye igihombo gikomeye kuko bari bafite icyizere cyo kwegukana igikombe cya kabiri cya AFCON mu mateka yabo.
Ku ruhande rwa Maroc, iyi ntsinzi ibaye intsinzi idasanzwe kandi y’amateka, nubwo itabonetse mu buryo busanzwe bwo gutsinda mu kibuga.
Kugeza ubu, haracyari kwibazwa niba Sénégal izakomeza kwitabaza izindi nzego z’ubutabera mu mikino mpuzamahanga, mu gihe CAF yo isa n’iyamaze gufata icyemezo ndakuka.
Icyakora, ibi byabaye bigaragaza isomo rikomeye ku makipe yose yo ku mugabane wa Afurika: kubahiriza amategeko n’ibyemezo byo mu kibuga ni ingenzi, n’iyo byaba bitanyuze ikipe runaka.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
