U Rwanda rukomeje kugaragaza isura nshya y’iterambere ku rwego mpuzamahanga, aho amashusho ya satellite aherutse gusesengurwa n’abashakashatsi mpuzamahanga agaragaza ko ari mu bihugu byo muri Afurika bigenda byiyongera mu rumuri rugaragara nijoro.
Iri sesengura ryakozwe n’abahanga bo muri Kaminuza ya Connecticut muri Leta Zunze Ubumwe za Amerika, ryibanze ku mashusho yafashwe hagati ya 2014 na 2022, rigaragaza impinduka mu rumuri rugaragara ku Isi mu masaha y’ijoro.
Amakuru yakusanyijwe yifashishije ikoranabuhanga rya NASA, aho hafashwe amashusho arenga miliyoni buri munsi.
Mu byagaragaye, u Rwanda ni kimwe mu bihugu byagiye byongera urumuri umwaka ku wundi, bigaterwa ahanini n’ikorwa ry’imishinga y’amashanyarazi n’ibikorwaremezo bijyanye n’amatara yo ku mihanda, cyane cyane mu Mujyi wa Kigali.
Imibare igaragaza ko mu Rwanda hari ibilometero bisaga 2185 by’imihanda icanye, mu gihe ingo zisaga 84,6% zifite amashanyarazi. Ibi bigaragaza intambwe igaragara igihugu kimaze gutera mu kugeza serivisi z’ibanze ku baturage.
Abashakashatsi bagaragaza ko urumuri rugaragara nijoro rufatwa nk’ikimenyetso cy’iterambere, kuko rwerekana aho ibikorwa by’ubukungu, imijyi n’imibereho y’abaturage byiyongera. Mu Rwanda, urwo rumuri ntirugarukira mu mujyi gusa, kuko no mu byaro hari kwiyongera ikoreshwa ry’ingufu z’imirasire y’izuba.
Ku rwego rwa Afurika, ibihugu nka Somalia, u Burundi, Ghana na Guinea nabyo byagaragaye mu biri kongera urumuri nijoro. Icyakora, abahanga bagaragaza ko ibi bitavuze ko ari byo bifite urumuri rwinshi kurusha ibindi, ahubwo ari uko byiyongereye ugereranyije n’uko byari biri mbere.
Mu gihe hari ibihugu biri gutera imbere mu rumuri, ahandi ku Isi ho haragaragara umwijima ugenda wiyongera. Ibihugu nka Ukraine, Yemen, Afghanistan na Lebanon biri mu byagaragayeho igabanuka ry’urumuri, ahanini bitewe n’intambara n’ibibazo by’ubukungu byangiza ibikorwa remezo by’amashanyarazi.
Hari kandi ibihugu bimwe byo ku mugabane w’u Burayi byahisemo kugabanya urumuri ku bushake, mu rwego rwo kuzigama ingufu no kurengera ibidukikije.
Impuguke zigaragaza ko gukurikirana urumuri rw’Isi hifashishijwe satellite ari uburyo bugezweho bwo gusuzuma iterambere ry’ibihugu, kumenya aho ibikorwa byiyongera n’aho bigabanuka, ndetse no gufasha mu igenamigambi ry’ahazaza.
Ku Rwanda, ibi bipimo bishya bishimangira ko igihugu kiri mu murongo mwiza w’iterambere, ariko nanone bikerekana ko hakiri urugendo rwo gukomeza kugeza amashanyarazi kuri bose, by’umwihariko mu bice by’icyaro.
Iyi raporo isiga ishusho y’igihugu gikomeje guhinduka, aho urumuri rugaragara nijoro ruba ikimenyetso cy’ubuzima, iterambere n’icyizere cy’ejo hazaza.
Abenshi mu basesenguzi ndetse n’abakoresha imbuga nkoranyambaga batangajwe n’uko u Rwanda rugaragara mu mashusho ya satellite yo mu ijoro, aho igihugu cyagaragaye gifite urumuri rugaragara kurusha uko benshi babyumvaga.
Hari abavuze ko bari basanzwe bazi u Rwanda nk’igihugu kigifite ibice byinshi bitaragerwamo n’amashanyarazi, ariko ayo mashusho agaragaza isura itandukanye, igaragaza ko hari intambwe igaragara imaze guterwa mu kubaka ibikorwaremezo by’ingufu.
Igitangaje kurushaho ni uko urwo rumuri rutagaragara gusa mu Mujyi wa Kigali nk’uko benshi babyibwiraga, ahubwo rugaragara no mu tundi duce tw’igihugu, harimo n’icyaro.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
