Intambara iri kubera mu Burasirazuba bwo Hagati hagati ya Iran ku ruhande rumwe na Leta Zunze Ubumwe za Amerika ifatanyije na Israel ku rundi ruhande ikomeje gufata indi ntera, mu gihe Amerika yatangaje ko yagurishije Israel intwaro zifite agaciro ka miliyoni 151,8 z’amadolari.
Izi ntwaro zirimo ibisasu ibihumbi 12 byo mu bwoko bwa BLU-110A/B bifite uburemere bwa kilo zirenga 450 buri kimwe, bishobora gushyirwaho ikoranabuhanga ribiyobora rikabigeza ku ntego neza cyane.
Iki cyemezo cyatangajwe n’Umunyamabanga wa Leta ya Amerika ushinzwe Ububanyi n’Amahanga, Marco Rubio, wavuze ko cyafashwe hashingiwe ku bihe byihutirwa by’umutekano, bityo kikemererwa hatabanje kugisha inama Inteko Ishinga Amategeko.
Rubio yasobanuye ko guha Israel izi ntwaro byihutirwa ari ingenzi mu kurinda inyungu z’umutekano wa Amerika ndetse no gufasha umufatanyabikorwa wayo ukomeye mu karere guhangana n’ibitero bikomeje kwiyongera.
Izi ntwaro Israel yaziguze binyuze mu kigo cy’Abanyamerika gikora ibikoresho bya gisirikare cyitwa Repkon USA, gifite icyicaro muri Leta ya Texas.
Icyemezo cyo kugurisha izi ntwaro cyaje mu gihe intambara hagati ya Amerika na Israel ku ruhande rumwe na Iran ku rundi ruhande yatangiye tariki ya 28 Gashyantare 2026, ubwo ibihugu byombi byagabaga ibitero bikomeye muri Iran.
Muri ibyo bitero by’indege, abayobozi bakomeye ba Iran barimo Umuyobozi w’Ikirenga Ayatollah Ali Khamenei n’abandi bayobozi bo mu nzego za gisirikare n’iza politiki baguye muri ibyo bitero, ndetse n’abasivili benshi barapfa.
Nyuma y’ibi bitero, Iran yahise igaba ibitero byo kwihorera ikoresheje misile na drones ku butaka bwa Israel ndetse no ku birindiro bya Amerika biri mu bihugu byo mu Burasirazuba bwo Hagati.
Bimwe muri ibyo bitero byibasiye ibirindiro bya Amerika biri muri Qatar, Koweit, Bahrain, Arabie Saoudite na Iraq, ndetse n’ibindi bihugu byo mu karere.
Amerika ifite abasirikare barenga ibihumbi 60 muri ako karere, aho benshi bari muri Arabie Saoudite, Koweit na Qatar, mu gihe abandi bari mu nyanja mu bwato bunini bw’intambara nka USS Gerald R. Ford n’ubwato bwa USS Abraham Lincoln.
Icyakora icyemezo cyo kugurisha izi ntwaro cyateje impaka muri politiki ya Amerika, aho bamwe mu bagize Inteko Ishinga Amategeko bagaragaje ko batishimiye ko ubuyobozi bwa Perezida Donald Trump bwirengagije inzira zisanzwe zo kubanza kubaza Inteko.
Umudepite w’Umudemokarate, Gregory Meeks, yavuze ko iki cyemezo kigaragaza ko ubuyobozi bwa Trump butari bwiteguye neza iyi ntambara.
Yagize ati: “Ubuyobozi bwa Trump bwagiye buvuga ko bwari bwiteguye iyi ntambara. Ariko gukoresha impamvu z’ibihe bidasanzwe ukirengagiza Inteko Ishinga Amategeko byerekana indi shusho itandukanye.”
Mu gihe kimwe n’iki cyemezo cyo kugurisha intwaro, Perezida Donald Trump yanahuje abayobozi b’inganda zikora ibikoresho bya gisirikare muri Amerika mu nama yabaye ku wa 6 Werurwe 2026.
Iyo nama yitabiriwe n’abayobozi b’inganda zikomeye ku isi zirimo BAE Systems, Boeing, Honeywell Aerospace, L3Harris Missile Solutions, Lockheed Martin, Northrop Grumman na Raytheon.
Muri iyo nama, izi nganda zemereye Trump ko zigiye gukuba kane umusaruro w’intwaro, indege z’intambara n’ibindi bikoresho bya gisirikare zikora.
Uruganda Lockheed Martin rwatangaje ko rwemeye kongera cyane intwaro rukora mu rwego rwo gukomeza gushyigikira igisirikare cya Amerika no kugifasha kuguma ku isonga ku rwego mpuzamahanga.
Abayobozi b’uru ruganda bavuze ko bamaze amezi make batangiye uyu mushinga ku bufatanye na Minisiteri y’Ingabo ya Amerika.
Perezida Trump we yavuze ko kongera umusaruro w’intwaro ari ingenzi cyane muri iki gihe isi irimo guhura n’intambara zikomeye, cyane cyane mu Burasirazuba bwo Hagati.
Yanatangaje ko mu mezi abiri ari imbere hazongera kuba indi nama igamije gusuzuma aho umusaruro w’intwaro ugeze n’uko inganda zikomeje gushyigikira igisirikare cya Amerika.
Abasesenguzi mu bya politiki mpuzamahanga bavuga ko ibi byemezo bishya bishobora kurushaho kongera ubushyamirane mu Burasirazuba bwo Hagati, cyane ko Iran ikomeje kuvuga ko izakomeza kwihorera ku bitero byagabwe ku butaka bwayo.
Hari n’abavuga ko kongera umusaruro w’intwaro muri Amerika bishobora gutuma intambara irushaho gukomera aho kugabanyuka.
Mu gihe ibintu bikomeje kuba bibi muri ako karere, isi yose iracyakomeje gukurikiranira hafi uko iyi ntambara ishobora guhindura umutekano n’ubukungu ku rwego mpuzamahanga.
Nubwo Amerika ivuga ko iri gufasha Israel kwirwanaho no kurinda inyungu zayo, Iran yo ivuga ko ibi ari ibikorwa byo kuyitera no kugerageza guhindura ubutegetsi bwayo, ibintu bishobora gutuma intambara ikomeza gukomera mu minsi iri imbere.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
