Mu gihe umubano hagati ya Leta Zunze Ubumwe za Amerika na Iran ukomeje gukomera, abayobozi b’ibihugu byombi baragaragaza impande zabo ku buryo butandukanye, bitanga icyizere gike ariko n’ubutumwa bwo kwirinda intambara nyakuri.
Ambasaderi wa Amerika mu Muryango wa NATO, Matthew Whitaker, yavuze ko Perezida Donald Trump atifuza ko Iran “isenyuka” nk’uko byagenze muri Libya ubwo Perezida Barack Obama yafashaga imyigaragambyo yakuyeho Muammar Gaddafi mu 2011.
Whitaker yabwiye Fox News ko Trump yashyizeho ingamba zo gushyira igitutu kuri Tehran, harimo no kohereza amato y’intambara mu Burasirazuba bwo hagati, ariko byose ari mu rwego rwo “kwerekana imbaraga no kuburira Iran,” aho kwinjira mu ntambara nyakuri.
Yavuze ko Trump yatanze igihe ntarengwa kuri Iran kugira ngo yemere amabwiriza ya Washington, ariko ko Amerika itazigera yihutira gusenya igihugu mu buryo bwakoreshejwe muri Libya.
Whitaker yongeyeho ko “Perezida Trump arifuza ko ibintu bigenda neza, kandi atifuza kubona intambara ikomeye cyangwa igihombo cy’abaturage b’abasivile.”
Ku rundi ruhande, Umuyobozi w’Ikirenga wa Iran, Ayatollah Ali Khamenei, ko mu gihe Amerika cyangwa undi wese yagerageza gutera Iran, “intambara izagera mu karere kose.”
Khamenei yavuze ko Abanya-Iran batazaterwa ubwoba n’amagambo cyangwa ibikorwa bya Amerika, kandi ko igihugu cye kizahita gisubiza ibitero byose bikomeye, mu rwego rwo gusubiza uyibuza amahwemo.
Umwuka mubi hagati y’ibihugu byombi watangiye kwiyongera cyane nyuma y’imyigaragambyo ya politiki n’ubukungu yabaye mu mpera z’Ukuboza 2025, aho imibare yerekana ko abantu barenga 3.100 bishwe mu myigaragambyo.
Ibi byatumye umubano wa Amerika na Iran uhinduka ikibazo gikomeye mu ruhando mpuzamahanga, kandi abayobozi bakomeje guhererekanya ubutumwa bw’amagambo n’ingufu mu buryo bwitondewe, buri ruhande rwibanda ku nyungu zarwo.
Nubwo hari ubwoba ko ibintu bishobora guturuka ku makosa y’itumanaho cyangwa kwirengagiza ibimenyetso, ubushishozi bwa Trump bwagaragaye nk’ukugerageza kwirinda icyateza urugomo rurenze. Ku rundi ruhande, Tehran ikomeza gushimangira ko itari yo ishaka gutangiza intambara, ariko ko nta mpamvu yo gutinya no kwirengagiza ibikorwa byayo by’ubwirinzi.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
