Ihuriro rya AFC/M23 ryemeje ko ryohereje amatsinda y’abakomando kabuhariwe hafi y’Umujyi wa Kisangani muri Repubulika Iharanira Demokarasi ya Congo, mu gikorwa rivuga ko kigamije guhagarika ibitero by’indege zitagira abapilote (drones) byakorerwaga ku bice rigenzura mu Ntara za Kivu y’Amajyaruguru na Kivu y’Amajyepfo.
Aya makuru yemejwe n’ubuyobozi bw’iri huriro, busobanura ko abo bakomando boherejwe hafi y’Ikibuga Mpuzamahanga cy’Indege cya Bangoka giherereye mu mujyi wa Kisangani.
Iki kibuga cy’indege bivugwa ko cyakoreshwaga n’ingabo za Leta ya Congo (FARDC) n’abafatanyabikorwa bazo mu gutegura no kohereza drones zagabaga ibitero ku birindiro bya AFC/M23 ndetse no ku baturage basanzwe.
AFC/M23 yemeje ko ari yo yagabye igitero cya drones cyibasiye iki kibuga cy’indege inshuro ebyiri zikurikirana, ku wa 1 Gashyantare no ku wa 1 Werurwe 2026. Ibi bitero byari bigamije gusenya igice cy’iki kibuga cy’indege cyakoreshwaga mu bikorwa bya gisirikare.
Ubuyobozi bwa AFC/M23 buvuga ko iki gikorwa cyakozwe mu rwego rwo gukumira ibitero byakomeje kuvugwa ko byaturukaga muri icyo kibuga cy’indege. Nk’uko iri huriro ribisobanura, drones zoherezwaga zivuye i Kisangani zatezaga umutekano muke mu bice byinshi byo mu Burasirazuba bwa Congo.
Umuvugizi wungirije wa AFC/M23, Dr. Oscar Balinda, yavuze ko amatsinda y’abakomando yoherejwe akora ibikorwa byihariye byo kwinjira mu bice by’ingenzi agasohoza ubutumwa bwihariye hanyuma agasubira aho yaturutse.
Dr. Balinda yagize ati: “Ingabo z’abakomando zigenda amanywa n’ijoro, zijya gukora akazi zarangiza zikagaruka. Rero baragiye barakora, barangije baragaruka. Iryo terabwoba ni ryo dushaka guhagarika kugira ngo twubahirize agahenge, dusubire ku meza y’ibiganiro, tugere ku mahoro arambye.”
Aya magambo agaragaza ko iri huriro rivuga ko ibikorwa byaryo bigamije guhagarika ibitero bivugwa ko byakorerwaga ku bice rigenzura, mu rwego rwo gutuma habaho ituze rishobora gutuma impande zihanganye zisubira ku meza y’ibiganiro.
Ibi bibaye mu gihe intambara yo mu Burasirazuba bwa Congo ikomeje gufata indi ntera, aho impande zitandukanye zikomeje gushinjanya kugaba ibitero ku baturage n’ibirindiro bya gisirikare.
Mu rindi tangazo ryashyizwe ahagaragara ku wa 2 Werurwe 2026, AFC/M23 yatangaje ko yungutse abarwanyi bashya 1518 barangije amahugurwa ya gisirikare mu kigo cya Rumangabo giherereye muri Teritwari ya Rutshuru.
Iri huriro rivuga ko aba barwanyi bashya ari abakomando bafite ubumenyi bwihariye mu bijyanye n’intambara zigenda zikorwa n’ingabo zigenda zishakisha umwanzi aho ari hose, aho gushinga ibirindiro bihoraho.
Rumangabo ni kimwe mu bigo bya gisirikare bikomeye byo mu Burasirazuba bwa Congo, kandi cyagiye gikoreshwa mu gutorezamo abasirikare mu gihe kirekire.
Ubuyobozi bwa AFC/M23 buvuga ko aba barwanyi bashya bagiye kongerera imbaraga ibikorwa byabo byo kurinda ibice bagenzura no kurwanya ibitero by’ingabo za FARDC n’abo bafatanyije.
Umuyobozi w’Ibiro by’Umuyobozi Mukuru wa AFC/M23, Yannick Tshisola, yagaragaje ko aba bakomando bashya bashobora kuzifashishwa mu bikorwa byihariye birimo n’ibitero nk’ibyagabwe ku kibuga cy’indege cya Bangoka.
Yagize ati ko aba barwanyi bafite ubumenyi bwo gukora ibikorwa bya gisirikare bishingiye ku bwihisho no ku kugenda bagaruka vuba nyuma yo gusohoza ubutumwa.
Abasesenguzi b’umutekano bavuga ko kohereza abakomando hafi ya Kisangani bishobora kugaragaza uburyo iyi ntambara igenda yinjira mu bice bishya by’igihugu, kure cyane y’aho ibikorwa bya gisirikare byibandaga mbere.
Kisangani ni umwe mu mijyi minini ya Repubulika Iharanira Demokarasi ya Congo, kandi ikibuga cy’indege cya Bangoka gifatwa nk’ingenzi mu bikorwa by’ubwikorezi bw’abantu n’ibikoresho.
Nubwo AFC/M23 ivuga ko ibitero byayo bigamije ibikorwaremezo bya gisirikare gusa, ibikorwa bya drones n’ibindi bitero byo mu kirere bikomeje gutera impungenge ku mutekano w’abaturage batuye hafi y’aho bibera.
Ku rundi ruhande, ubuyobozi bwa Kinshasa ntiburagira icyo butangaza ku mugaragaro ku bivugwa na AFC/M23 birebana n’ikorwa rya drones zivugwa ko zagabaga ibitero zivuye i Kisangani.
Mu gihe impande zombi zikomeje gushinjanya ibikorwa bya gisirikare, abasesenguzi bavuga ko amahirwe y’ibiganiro bya politiki ashobora kugenda agabanuka niba ibikorwa by’intambara bikomeje kwiyongera.
AFC/M23 yo ivuga ko igikorwa cyo kohereza abakomando no kugaba ibitero ku kibuga cy’indege cya Bangoka kigamije guhagarika ibikorwa by’igisirikare cya Congo bishobora guhungabanya agahenge kari kavuzweho n’impande zitandukanye.
Iri huriro risaba ko impande zose zubahiriza agahenge kandi zigashaka umuti w’ikibazo cy’intambara yo mu Burasirazuba bwa Congo binyuze mu biganiro bya politiki.
Mu gihe amahanga akomeje gukurikirana uko ibintu bihagaze muri iki gice cy’akarere k’Ibiyaga Bigari, ibibazo by’umutekano bikomeje kuba ingorabahizi ku baturage bo mu ntara za Kivu y’Amajyaruguru na Kivu y’Amajyepfo.
Ibyemezo bya gisirikare nk’ibi byo kohereza abakomando hafi ya Kisangani bishobora kugira ingaruka ku miterere y’intambara iri kubera mu Burasirazuba bwa Repubulika Iharanira Demokarasi ya Congo mu gihe kiri imbere.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
