Mu gihe amahanga ahugiye mu ntambara ikomeye iri guhuza Israel, Leta Zunze Ubumwe za Amerika na Iran, ihuriro rya AFC/M23 ryatangaje ko rigiye gukomeza ibikorwa bya gisirikare mu Burasirazuba bwa Repubulika Iharanira Demokarasi ya Kongo, by’umwihariko rikomeza ibitero ku kibuga cy’indege cya Bangoka i Kisangani no guhorera Lt Col Willy Ngoma wahoze ari Umuvugizi waryo ku rwego rwa gisirikare.
AFC/M23 yemeje ko ari yo yagabye igitero cya drones ku kibuga cya Bangoka ku wa 1 Werurwe 2026, isobanura ko cyari kigamije gusenya drones zari zigiye koherezwa gutera ibirindiro byayo no kwibasira abasivili. Si ubwa mbere iki kibuga cy’indege cyaba kibasiwe, kuko no ku wa 1 Gashyantare 2026 nabwo cyagabweho igitero cyasobanuwe nk’icyari kigamije gusenya igice gikoreshwa n’ingabo za Leta ya RDC mu gutegura no kohereza ibitero bya drones.
Mu rukerera rwa tariki ya 24 Gashyantare 2026, ihuriro ry’ingabo za Leta ya RDC ryagabye igitero cya drones hafi ya santere ya Rubaya muri Teritwari ya Masisi, cyicirwamo abarwanyi ba AFC/M23 barimo Lt Col Willy Ngoma. Urupfu rwe rwafashwe nk’igikomere gikomeye muri iri huriro, rivuga ko rugomba guhorerwa.
Umuyobozi Wungirije wa AFC/M23 ushinzwe ibikorwa bya politiki, dipolomasi n’imiyoborere, Bertrand Bisimwa, yatangaje ko mu gihe abahuza mu biganiro by’amahoro badashoboye gusaba Leta ya Kinshasa guhagarika ibitero byayo, iri huriro rifite inshingano yo kurinda ubuzima bw’abasivili.
Yagize ati: “Mu gihe abahuza muri gahunda y’amahoro batarashobora gusaba Kinshasa kubahiriza ibyo yemeye cyangwa guhagarika ibikorwa byayo by’ubugome byibasira inzirakarengane, ikiba gisigaye kuri twe ni ugukora umurimo dusabwa n’igihugu wo kurinda abaturage.”
Umuvugizi wa AFC/M23 mu rwego rwa politiki, Lawrence Kanyuka, na we yashimangiye ko amaraso y’abarwanyi babo n’abasivili bishwe atazibagirana.
Yagize ati: “AFC/M23 iributsa ko amaraso ya bagenzi bacu b’Abanye-Congo bishwe nabi, n’abasirikare bacu benshi barimo Umuvugizi wacu ku rwego rwa gisirikare, Lt Col Willy Ngoma, atazibagirana cyangwa ngo acecekwe. Leta ya Kinshasa n’ihuriro ryayo ry’abagizi ba nabi rizabazwa ibi byaha.”
Ibi byose bibaye mu gihe Leta ya RDC yari yagiranye n’ihuriro AFC/M23 amasezerano y’agahenge mu biganiro byabereye muri Qatar, ariko impande zombi zikomeje gushinjanya kutubahiriza ibyo zumvikanyeho. Ingabo za Leta zikomeje kugaba ibitero mu ntara ya Kivu y’Amajyaruguru na Kivu y’Amajyepfo, ibintu byatumye imirwano irushaho gukaza umurego.
Mu rwego mpuzamahanga, intambara iri guhuza Israel, Amerika na Iran, mu gikorwa cya gisirikare cyiswe Operation Epic Fury, iri gukurikirwa cyane n’amahanga, bigatuma ibibazo byo mu Burasirazuba bwa Congo bitabona umwanya uhagije mu itangazamakuru mpuzamahanga.
Abasesenguzi bavuga ko uko amahanga ahugiye mu bibazo byo mu Burasirazuba bwo Hagati, bishobora gutuma impande zihanganye muri RDC zikaza umurego w’ibikorwa bya gisirikare nta gitutu gikomeye cy’amahanga.
Kuri ubu, AFC/M23 igaragaza ko itazahagarika ibikorwa byayo mu gihe ivuga ko ibirindiro byayo n’abaturage bikomeje kwibasirwa. Ku rundi ruhande, Leta ya RDC ntiragira icyo itangaza ku magambo yo guhorera Willy Ngoma, ariko imirwano mu Burasirazuba bwa Congo irakomeje, abaturage bakaba bakomeje guhura n’ingaruka zayo.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
