Umugaba Mukuru w’Ingabo za Uganda, Gen. Muhoozi Kainerugaba, yongeye gufata icyemezo gikomeye mu rugamba rwo kurwanya ruswa n’imikorere idahwitse mu gisirikare, ategeka itabwa muri yombi ry’abasirikare bakuru babiri bafite amapeti ya Jenerali.
Amakuru yemejwe ku wa Kane tariki ya 26 Werurwe agaragaza ko Maj. Gen Don William Nabasa na Brig. Gen Johnson Namanya Abaho batawe muri yombi bakekwaho ibyaha bifitanye isano na ruswa.
Uku gutabwa muri yombi kwabo kwashyizwe mu bikorwa ku mabwiriza ya Gen. Muhoozi Kainerugaba, binyuze ku Mugenzuzi Mukuru w’Ingabo za Uganda akanaba Umugaba Mukuru wungirije wazo, Lt. Gen Sam Okiding.
Abo basirikare bombi babanje gufungirwa ku Cyicaro Gikuru cy’Ingabo za Uganda giherereye i Mbuya, mbere yo kwimurirwa mu ibanga rikomeye mu masaha y’ijoro, bajyanwa muri gereza y’umutwe w’ingabo zidasanzwe ya Kasenyi iri ku muhanda ujya i Entebbe.
Maj. Gen Nabasa yari asanzwe ashinzwe igenamigambi n’imikorere ya buri munsi mu ngabo za Uganda, mu gihe Brig. Gen Namanya yari aherutse gukurwa ku nshingano zo kuyobora ishami rishinzwe abinjira n’abasohoka muri Minisiteri y’Umutekano w’Imbere mu Gihugu, icyemezo cyari cyafashwe na Gen. Muhoozi ubwe.
Gufatwa kw’aba ba-Jenerali kuje gukurikira ibindi byemezo bikomeye byafashwe mu minsi ishize, aho abasirikare benshi bakomeye mu Ngabo za Uganda (UPDF) bagiye bakurwa ku myanya yabo, abandi bagafungwa.
Ibi byose bikomeje kugaragaza umurongo mushya wo gukaza imyitwarire no kubazwa inshingano mu rwego rw’umutekano.
Abasesenguzi bavuga ko Gen. Muhoozi ari gushyira imbaraga mu gusukura inzego z’igisirikare, agamije kongera icyizere n’imikorere myiza mu ngabo ayoboye. Uyu murongo we ugaragara nk’ushaka gushyira iherezo ku bikorwa bya ruswa n’imyitwarire idahwitse byagiye bivugwa mu nzego zimwe z’umutekano.
Nubwo bimeze bityo, hari abibaza ku ngaruka z’ibi byemezo bikomeye, cyane cyane ku mibanire n’imikorere y’imbere mu gisirikare, dore ko gufata abasirikare bakuru bishobora kugira ingaruka ku mikorere isanzwe.
Icyakora ku ruhande rw’ubuyobozi bw’igisirikare, ibi bikorwa bishimangirwa nk’intambwe ikomeye iganisha ku kubaka igisirikare gifite umurongo uhamye, kirangwa n’ikinyabupfura, ubunyamwuga no kubazwa inshingano kuri buri wese uri mu nzego zacyo.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
