Perezida Tshisekedi mu mazi abira nyuma y’ibyo Abashinwa bakoze bikamuteranya na Amerika.
Ubwumvikane hagati ya sosiyete ya Sicomines ihuriweho n’Abashinwa na Leta ya Repubulika Iharanira Demokarasi ya Congo burimo kugenda burushaho kuzamo agatotsi, nyuma y’uko iyi sosiyete yanze kwakira igenzura ry’imari n’imikorere ryari riteganyijwe mu minsi ya vuba.
Iryo genzura ryari rigamije gusuzuma imikorere, gukorera mu mucyo no kureba niba amasezerano impande zombi zagiranye yubahirizwa uko bikwiye. Gusa amakuru aturuka mu nzego za Leta ya Kinshasa agaragaza ko Sicomines yanze burundu kugenzurwa, itigeze inatanga indi gahunda ibisimbura cyangwa igihe bishobora gukorerwa.
Iyi myitwarire yongeye kuzamura impaka ku masezerano ya Sicomines yashyizweho mu 2008, ashingiye ku ihame ryo “guhana amabuye y’agaciro n’ibikorwa remezo.”
Muri ayo masezerano, ihuriro ry’amasosiyete y’Abashinwa ryahawe uburenganzira bwihariye ku mabuye y’agaciro ya RDC, riyahaye agaciro mu buryo bwo kubaka ibikorwa remezo.
Mu myaka yakurikiyeho, aya masezerano yakomeje kunengwa n’impuguke n’imiryango itandukanye, ishinja kuba harimo ubusumbane mu nyungu ndetse no kutagaragara mu micungire yayo.
Raporo zakozwe n’inzego zirimo izishinzwe gukurikirana umutungo kamere n’imari ya Leta zagaragaje ibibazo bikomeye mu miyoborere, bituma havuka igitekerezo cyo kuyavugurura.
Mu rwego rwo gushaka igisubizo, ku wa 14 Werurwe 2024, Leta ya Congo n’abafatanyabikorwa bayo b’Abashinwa bashyize umukono ku ivugururwa rya gatanu ry’aya masezerano, ryazamuye agaciro k’ibikorwa remezo kuva kuri miliyari 3.2 z’amadolari ya Amerika rikagera kuri miliyari 7, ndetse rinongera uruhare rwa Leta mu micungire y’ikigo cy’amashanyarazi cya SICOHYDRO.
Icyakora, umwaka umwe nyuma y’aya mavugurura, impungenge ku ishyirwa mu bikorwa ryayo ziracyari nyinshi. Ku wa 14 Werurwe 2025, ihuriro ry’imiryango itari iya Leta “Congo Is Not for Sale” ryateguye inama i Kinshasa, rigamije gusuzuma aho ishyirwa mu bikorwa rigeze no kureba ibibazo bikigaragara.
Ibi bibazo bibaye mu gihe ku rwego mpuzamahanga hari uguhangana gukomeye ku mabuye y’agaciro y’ingenzi, cyane cyane hagati ya Leta Zunze Ubumwe za Amerika n’u Bushinwa.
RDC ifatwa nk’igihugu gifite akamaro gakomeye muri iri rushanwa kubera ko ikungahaye kuri cobalt na cuivre bikenerwa cyane mu ikoranabuhanga rigezweho.
Amakuru aheruka agaragaza ko Leta ya Perezida Félix Tshisekedi yagiranye andi masezerano na Amerika ku bijyanye n’ubushakashatsi no gucukura amabuye y’agaciro. Ibi ngo byarakaje abafatanyabikorwa b’Abashinwa bari muri Sicomines, ndetse bituma umwuka w’ubwumvikane urushaho kuba mubi.
Abasesenguzi bagaragaza ko hari ingingo zimwe muri ayo masezerano mashya zinyuranyije n’izo mu masezerano ya mbere ya Sicomines, cyane cyane izijyanye n’uburenganzira bwihariye ku mabuye y’agaciro n’igihe kirekire cyo kuyabyaza umusaruro.
Hari ababona ko Leta ya Congo iri kugerageza kuringaniza inyungu z’ibihugu bikomeye ku isi kugira ngo ibone inyungu nyinshi, ariko abandi bakabifata nk’uburyo bushobora kuyishyira mu kaga ko kutizerwa n’abafatanyabikorwa bayo ba kera, ndetse bikongera igitutu cya politiki mpuzamahanga.
Kwanga kugenzurwa kwa Sicomines bifatwa kandi nk’ikibazo gikomeye ku buyobozi bwa Leta, kuko bishobora gusobanurwa nk’ukutubaha ububasha bw’igihugu no kudashyigikira gahunda yo kunoza imicungire y’umutungo kamere.
Hari n’andi makuru agaragaza ko ubwumvikane buke bushobora kuba buturuka imbere mu nzego za Leta ubwazo. Abari hafi y’ubuyobozi bavuga ko itsinda ryagombaga gukora iryo genzura ridafite ubwigenge n’ubunyangamugayo buhagije, rikaba rishinjwa kuba rifitanye inyungu zihariye n’abo ryagombaga kugenzura.
Ibi byose bituma hazamuka ibibazo bikomeye ku hazaza h’ubufatanye hagati ya Congo n’abashoramari b’Abashinwa, ndetse n’icyizere rusange mu ishoramari rishingiye ku mabuye y’agaciro muri icyo gihugu.
Perezida Félix Tshisekedi ari mu mazi abira nyuma y’uko sosiyete z’Abashinwa zikorera muri Sicomines zanze kwakira igenzura, ibintu byashyize ubutegetsi bwe mu mwuka mubi w’ihangana rikomeye n’ibihugu bikomeye ku isi.
Iyi myitwarire y’Abashinwa yasize Tshisekedi asa n’utagifite ijambo ku micungire y’umutungo kamere w’igihugu, mu gihe yari amaze iminsi agerageza kwerekana ko Congo ishobora kugenzura neza amasezerano mpuzamahanga.
Icyemezo cyo kwanga igenzura cyaje gikurikira andi masezerano mashya ubutegetsi bwa Tshisekedi bwagiranye na Leta Zunze Ubumwe za Amerika ku bijyanye n’ubucukuzi bw’amabuye y’agaciro, ibintu byatumye Abashinwa babyakira nabi.
Ubu rero Perezida wa Congo asigaye hagati y’impande ebyiri zikomeye: u Bushinwa bumushinja gutatira amasezerano, na Amerika ishaka inyungu mu mutungo wa Congo, bityo bikamushyira mu ihurizo rikomeye rya dipolomasi n’ubukungu.
Abasesenguzi bavuga ko uyu mwuka mubi ushobora gutuma Tshisekedi atakarizwa icyizere n’impande zombi, kuko Abashinwa bamubonamo uwo batagishobora kwiringira, mu gihe n’Abanyamerika bashobora kumufata nk’utari uhagaze ku murongo umwe.
Ibi byose bishyira ubutegetsi bwe ku gitutu gikomeye, aho icyemezo cyose azafata gishobora kugira ingaruka zikomeye ku bukungu bwa Congo no ku mibanire yayo n’ibihugu bikomeye ku isi.
Tubibutse ko mushobora gukomeza kudukurikirana ku mbuga nkoranyambaga.
Kanda hano udukurikirane kuri Facebook, Hano udukurikirane kuri WhatsApp
